DISFRUTA DO DIA DO LIBRO.......LEE

DIA DO LIBRO .LER NA CASA

A lectura e a chave que abre a porta ás relacións sociais, á comunicación, ao coñecemento, ao lecer e ao traballo.
A escola e a familia poden accionar esa chave para facilitar a incorporación de nenos e mozos á cultura e ao conxunto
de valores compartidos da sociedade adulta. Familia e escola deben ir da man, asumindo ambos o seu compromiso
como mediadores directos entre os libros e os nenos. Cal é o papel de cada un nesta responsabilidade compartida?
A escola asume hoxe dúas grandes metas. A primeira, alfabetizar a un nivel alto a toda a poboación infantil e xuvenil.
A segunda, compartida con outras institucións, fomentar o hábito e o gusto pola lectura. Ambos aspectos se sintetizan
no obxectivo de formar lectores e escritores competentes que sexan capaces de descodificar, comprender o significado
e interpretar o texto outorgando sentido ao que len, tanto polo que di como polo contexto do tema que trata.
A familia non pode delegar na escola o seu papel na formación lectora dos seus fillos. O que os nenos aprenden na
escola é só unha pequena parte do que se ilustran dos seus pais, parentes, amigos, do contorno no que se desenvolven,
dos medios de comunicación... Por iso, a familia conta, e moito, na creación do gusto pola
lectura, reforzando en casa o que se aprende na escola creando situacións lectoras na vida cotiá, lendo
xuntos. O mellor xeito de animar a ler é compartir os bos libros rodeados de voces amigas. Os fillos fíxanse máis
no que fan os pais que no que eles lles din.

ACTIVIDADES PARA O DÍA DO LIBRO

Esta semana imos por en marcha unha serie de actividades para conmemorar a celebración do DÍA DO LIBRO que subiremos pouco a pouco no blogue.

En primeiro lugar agradecemos a Paula Carballeira o precioso texto co que nos obsequiou para esta data.

Só un libro
Non sei que facer.
Miña irmá regaloume un libro.
Un libro.
Entre todos os agasallos que puido escoller, escolleu este.
Un libro.
Por que?
Que lle fixen eu?
Míroo e remíroo.
Sacúdoo, a ver se ten algo entre as follas, ademais de letras e debuxos.
Nada.
É só un libro.
Paréceme inútil, aí quieto, sen moverse.
Éntranme ganas de rompelo, de escachalo, de queimalo, de estragalo...
A ver se así reacciona.
Non.
Que vai reaccionar!
Espera.
O libro espera.
Non se decata de que son máis forte ca el.
Non se decata de que podería esnaquizalo se me deixase levar polo xenio.
Se cadra estase rindo de min.
Crerase moi importante por ser un libro.
Vouno abrir.
Teño curiosidade por saber que escribiron dentro del para que teña eses
aires de superioridade.
Vaia!
Non está nada mal.
Empézame a caer simpático.
Tan caladiño, gardando a súa historia coma quen garda un segredo.
Ás veces penso que a miña irmá pode lerme o pensamento.
Era xusto o que eu quería.
Un libro.
Este libro.
                                                                              Paula Carballeira